Dohainezko wifi gunea jarri dau Udalak Gizarte eta Kultura Etxean

Interneten debalde ibiltzeko sarbide guneak jarri dauz Bermeoko Udalak Gizarte eta Kultura Etxean eta goiko plazan wifi sistemaren bidez. Erabiltzaileek konexinoa egiten daben momentuan bakarrik jarriko dira martxan antenak. Holan, argindarra aurrezteaz ganera ingurumena be jagongo da. Gune bi horreetaz aparte, Lamerako lanak amaitzen diranean parkearen inguruan be wifi sistema izango da, dohainik.

Interneterako sarbide-guneak holan funtzionatzen dabe:

• Sarbide libreko sarea da, pasahitza barik. Sarearen izena "bermeo wifi" da. Sarera konektatzeko, adibidez, ordenagailu portatil batetik, PDAtik, telefonoz edo dispositibo multimediak erabiliz, ez da IP helbiderik konfiguratu behar wifi txartelean, sistema berak egiten baitau automatikoki.
• Gizarte eta Kultura Etxean edo kalean detektatu daitekeen sarbide-segurtasuna daukan beste edozein wifi sarea ez da erabilpen publiko eta librekoa.

Joan zaitez doan bariku honetako Art After Dark jaialdira GIZeri esker

Hilean behin, Art After Dark izenagaz ezagutzen diran musika saioak eskaintzen dauz Guggenheim Bilbao Museoak, Fever aretoagaz lankidetzan. Musika emonaldiak Museoko Atrioan izaten dira. Era berean, dagozan erakusketak bisitatzeko aukera dago. 18 urtetik gorakoei zuzendutako saioak dira eta bariku gauetan izaten dira.

Bariku honetako (martxoak 12) Art After Dark jaialdira Bermeoko GIZek eroango zaitu doan, izan be, 4 sarrera zozketatuko dauz.

Zozketan parte hartu gura daben guztiak mezu bat bialdu behar dabe GIZen helbide elektronikora martxoaren 12 honetako goizeko 9ak baino lehen. Mezuan, izen-abizenak, adina eta telefono zenbakia jarri beharko dira. Parte-hartzaile guztien artean 4 sarrera zozketatuko doguz!!

O'Funk'illoren Barakaldoko kontzertua hilaren 19an izango da

O'Funk'illo taldeak pasa dan zapatuan Barakaldoko RockStar Live aretoan eskaini behar eban kontzertua bertan behera geratu zan haizearen ondorioz. Antolatzaileek, baina, topatu dabe kontzerturako data barria: martxoaren 19a, hain zuzen. GIZek zozketatutako hiru sarrera bikoitzak bardin-bardin balioko dabe data barri horretarako. Sevillako taldea bere azken bira izango ei dana aurkezten dabil Espainian zehar.

Aurkeztu dabe Bermeon izango dan Ibilaldiaren abestia eta bideoklipa

Aurkeztu dabe maiatzaren 30ean 'Marigoran Kikunbera' lelopean Bermeon ospatuko dan Ibilaldiaren abestia eta bideoklipa. Bizkaiko Ikastolen aldeko jaialdiaren 32. edizinoa izango da aurtengoa. Agus Barandiaran Korrontzi taldeko buruak jaso eban abestia egiteko enkargua, eta baita be, trikitixa doinuakaz alaituta, folk ikutuagaz, Alex Sardui eta Mikel Urdangarin lako musikarien ekarpenagaz sortu dau kantua. Ikusi hemen bideoklipa.

Jabier Elortegi zinema zuzendari bermeotarra izan da bideokliparen zuzendaria. Elortegik eskarmentu handia dauka zuzendari lanetan, besteak beste, Goenkale, 'Go!azen' edota Agitacion + IVA saioak zuzendu dauz. Filma luzeei jagokenez, 'Go!azen' eta 'Zorion Perfektua' zuzendu dauz.

Bideoklipean hainbat persona ezagun agiri dira, Ilaski Serrano, Abel Barriola, Julio Ibarra, Julian Iantzi... ikastolako ikasle, irakasle eta beste hainbestegaz batera, jantzan. Euskeraren erabilera sustatzea da kantaren letraren oinarria eta, tartean, Bermeon hain erabiliak diran berbak agertzen dira: marigoran, kikunbera, itsasoa, txo, kalian gora-kalian behera...

Astelehenean igiriko da 'Udalekuak' programan izena emoteko epea

Bizkaiko Foru Aldundiak datorren astelehenean, martxoak 15, jarriko dau martxan 'Udalekuak' programa. Programa hau udan izango dira, uztailean batez be, eta 7 eta 13 urte bitarteko gazteei zuzenduta dago. 7 eta 10 eguneko txandak izango dira aurton, 111 € eta 162 €ko prezioa izango dabelarik, hurrenez hurren. Danatara, hamabost aterpetxe izango dira aukeran, besteak beste: zuhatza, zarautz, orio, hondarribia edo lurraskako bizkaia athletic.

'Udalekuak' programaren izen-emotea martxoaren 15etik 26ra izango da. Aurreinskripzinoak egiteko eta informazino gehiago lortzeko, epe horren barruan GIZetik pasatu beharko da. Pasa dan urtean, Bermeoko 50tik gora ume eta gaztetxo apuntatu ziran programa honetara. Halanda be, gitxiagok parte hartu eben, parte-hartzea zozketa bidez erabagitzen baita.

Bermeon grabatu gura dan 'Txoko' pelikularen ekoizlea izan ahal zara

Orain dala zazpi urte Bermeora heldutako Eoin Farrell irlandarrak 'Txoko' izeneko pelikula baten gidoia idatzi dau. Bere asmoa, eta proiektu honetan murgilduta dagozan zinegile bermeotarren asmoa, filma herrian bertan grabatzea izango litzateke. Badaukiez gidoia, zuzendaria, kokalekua eta filma grabateko behar daben ia ekipo osoa. Halanda be, ekoizpenerako behar daben gitxieneko aurrekontua 30.000 €-koa da.

Diru kopuru hori batu ahal izateko, herritarrek filman inbertitzeko aukera izango dabe txokothemovie.com webgunearen bidez. Gura dauenak ekoizpen zatiak izeneko akzino bereziak erosi leikez, 10 euroan bakotxa. Bakarra erosita kredituetan agertuko da eroslearen izena. 50 € gastatuz gero, filman estra bezala agertzeko aukera izango da. 30.000 €ko inbertsinoa inbertsoreei itzuliko jake filmatzaileak izandako lehen irabazietatik. Lehenengo inbertsino hori itzuli ostean, inbertsoreek irabazien portzentaia baten eskubidea izango dabe. Zenbatekoa inbertidutakoaren araberakoa izango da.

Suspensez beteriko filma
'Txoko' gidoi zoragarri bat da, suspensez betea. Gidoia Eoin Farrellek idatzi dau. Eoin Dublinen jaio bazan be, azken zazpi urteetan Bermeon bizi da eta proiektu honetan buru belarri dabil. 'Txoko' Bermeon eta inguruetan errodatuko da ingelesez eta euskeraz eta filma bateko ezaugarri guztiak batuko dauz euskal kostaldeko udalerrien edertasunagaz eta kulturagaz; eta hori guztiori ipiniko dau nazinoarteko jentearen begien aurrean.

Gazteen ekimenak saritu gura dauz Bilboko Jet Lag 10 programak

Jet Lag Bio 10 programak 'Ideiak' izeneko gazteentzako ideia lehiaketa abiarazo dau. Lehiaketa honegaz, Bilboko Udaleko Enplegu, Gazteria eta Kirol Sailak 18 eta 35 urte arteko gazteen ekimenak saritu gura dauz eta euren proiektuak gauzatzen lagundu. Martxoaren 8ra arte aurkeztu daitekez proiektuak, banaka zein taldeka. Egun horretara arte aurkeztutako proiektu guztien artean aukeratuko dira ekimenak. Sorkuntza prozesua maiatzaren 1etik irailaren 30era arte egingo da.

Ekimen saridunak, urrian izango dan Jet Lag Fest jaialdian aurkeztuko dira. Saritutako proiektuetako bakotxak 1.500 eta 4.000 euro bitarteko aurrekontua izango dau martxan ipinteko. Lehiaketaren oinarri osoak bilbao.net webgunean dagoz eskuragarri.