Aisialdiko begirale izateko 2025/26 ikastaroan izena emoteko epea urriaren 3ra arte egongo da zabalik

Bermeoko Gazteria Sailaren helburuetariko bat gazteei aukera hezigarriak eskaintzea da eta, horretarako, aisialdirako begirale ikastaroa antolatu dau 2025-2026ko ikasturterako, azken urteetako moduan. Prestakuntza honen bidez, hezkuntza astialdirako hezitzaileak trebatzea gura da eta gazteak gaitu gura dira lana bilatzeko prozesuan arrakasta izan daien.

Ikastaroa 2025eko urriaren 18an hasiko da eta 2026ko martxoaren 29ra arte iraungo dau. Izena emoteko epea urriaren 3ra arte dago zabalik (eskainitako plaza kopurua arinago beteten ez bada), GIZen. Bermeoko Gazteentzako Informazino Zerbitzura hurbildu (Bermeoko Gizarte eta Kultura etxean) eta izen-emote orria bete beharko da (Dokumentua deskargatzerakoan, bete eta elektronikoki sinatzeko aukera dago).

Ikasturte osoko 9 asteburu Bermeoko Gizarte eta Kultura Etxean izango dira, zapatuetan (10:00-14:45/16:00-18:30). Hiru asteburu, barriz, La Arboledako aterpetxean izango dira (zapatuko 10:00etatik domekako 14:00etara).

Ikastaroa atal bitan banatuko da: alde teorikoa (150 ordu) eta praktikoa (160 ordu). Derrigorrezkoa da atal biak gainditzea. Ikasleek 18 urte izan beharko dabez 2026an zehar eta 18 urte beteta izan praktikak egin ahal izateko. Ganera, DBHko titulazinoa izatea derrigorrezkoa da. Ikasleak euskaldunak izan beharko dira, ikastaroa euskeraz izango baita.

Prestakuntza amaitu ostean, Eusko Jaurlaritzako Aisialdiko Begirale titulu ofiziala emongo da. Matrikularen prezioa: 35 urte baino gitxiago daukien eta Bermeon erroldatutako gazteentzat 350 eurokoa izango da, beste guztientzat aldiz, 450 euro. Matrikularen barruan aterpeko hiru asteburuak (mantenu osoa) sartuta dagoz.

Ikastaroari buruzko informazino gehiago gura izatekotan, 94 617 91 58 telefono zenbakira deitu edo 688 81 99 50 WhatsApp zenbakira idatzi.

GLOBAL TRAINING: nazinoarteko inguruneetan esperientzia profesional handia eskuratzeko beka-programa

Euskadiko gazteen nazinoarteko prestakuntza eta mugikortasuna erraztea dauka helburu 2025eko GLOBAL TRAINING beka-programak. Horretarako, euren profil akademikoagaz lotutako jarduerak eta proiektuak egiten dabez, atzerrian esperientzia profesionala irabazi ahal izateko eta euren jarduera profesionala garatzeko oso erabilgarriak izango jakezan ezagutzak, kontaktuak eta tresnak eskuratzeko.

Aurtongoa Global Training beken XIII. edizinoa da eta 2012. urteaz geroztik, 5.503 gaztek jaso dabe beka hau. Gazteek 5 kontinenteetako 60 herrialdetan dagozan punta-puntako 500 enpresa eta erakunde baino gehiagotan egin ahal izan dabez praktika profesionalak.

Mundu global honetan gero eta garrantzitsuagoa da nazinoarteko ingurune eta merkatuetan moldatzeko gaitasuna izatea. Hori dala eta, Eusko Jaurlaritzak 445 Global Training beka jarri dauz zeure esku eta hasikerako prestakuntza-aldia eta atzerriko enpresetan eta erakundeetan egin beharreko 6 eta 12 hilabete arteko praktikaldia hartzen dauz.

Ezinbestekoa da ingelesa jakitea, B1 Goi-mailako Lanbide Heziketako titulua dabenentzat eta B2 unibertsidadeko titulua dabenentzat. Titulazino hori ez dabenek ingeles-azterketa bat gainditu beharko dabe.

445 gaztek eskuratuko dabez atzerrian enpresa-praktikak egiteko Global Training bekak. Beka horreen helburua da nazinoartean gazteen mugikortasuna sustatzea.

Eskariak aurkezteko epea irailaren 19ra artekoa da.

Aurreikuspenen arabera, 2025ko urria eta 2026ko urtarrila bitartean zehar izango da herrialde hartzaileetarako urteera.

● Baldintzak

✓ 2025eko urtarrilaren 1ean, 30 urte bete gabe izatea.
✓ Lizentziatura, Diplomatura, Gradua, Goi-mailako Lanbide Heziketa edo Goi-mailako ikasketak izatea.
✓ Euskadin erroldatuta egotea epea zabaltzen dan unea baino gitxienez 12 hilabete lehenagotik edo alkarren segidako 5 urtez aurreko 10 urteetan.
✓ Unibertsidade-tituludunentzako antzeko prestakuntza helburua daukan beste edozein laguntza jaso ez izana, baldin eta, laguntza horren bidez, nazinoarteko erakunde edo enpresetan 6 hilabetez edo epe luzeagoz praktikak egin badira atzerrian. Bereziki, beka honeetaz baliatzea ez da bateragarria honako beka honeen onuradun izateagaz: Global Training bekak, ICEX bekak, beste autonomia-erkidego batzuenak, merkataritza ganberenak, EBko Merkataritza Sustatzeko Erakundeenak edo antzeko beste erakunde batzuenak.
✓ Global Training 2025 praktikak egingo diran enpresa edo erakundean lan egin ez izana edo praktikarik egin ez izana.

● Global Training bekak 2025

✓ Praktikek gitxienez 6 hilabete iraungo dabe eta urtebetera arte luzatu daitekez.
✓ 40-60 orduko aldez aurreko prestakuntza eskaintzen da.
✓ 1.635 euroko zuzkidura gordina 6 hilabetetan honako gastu honeek estaltzeko: garraioa, ostatu- eta mantenu-gastuak eta beste gastu batzuk (adibidez bisatuak). Horrez ganera, programak aseguru medikoa, istripuetarako asegurua eta bidaietarako asegurua emoten deutsie bekadunei.
✓ Eremu geografikoa: mundu osoa.

Programak zazpi erakunde laguntzaileren kudeaketa eta tutoretza dauka:

• Ikaslan – AFM
• Novia Salcedo Fundazioa
• Euskal Herriko Unibertsitatea
• Garapen – Donostiako Sustapena
• Eusko Ganberak
• Confebask – ADEGI – Txorierri – HETEL
• Mondragon Unibertsitatea – Deustuko Unibertsitatea

Erakunde laguntzaile bakotxak bere webgunean argitaratu dauz eskaintzen dauzan praktikak. Eskatzaileek erakunde laguntzaile bakar baten bidez emon behar dabe izena. Hautagaitzak erakunde bateri baino gehiagori bialduz gero, hautaketa-prozesutik kanpo geratuko da. Beka guztiek eskubide eta betebehar, zuzkidura eta hautaketa-estandar berberak eskaintzen dabez.

Izena emoteko prozeduran, eskatzaile bakotxak beken baterako eskaintza eta erakunde laguntzaileen webguneak kontsultatu behar dauz eta gehien interesaten jakon erakundea aukeratu. Inskripzinoa egin ostean, aukeratutako erakundeak inskripzino- eta hautaketa-prozesuan emondako jarraibideak bete behar dira.

Global Training beka-programa Basque Trade & Investment (Nazinoartekotzearen Euskal Agentzia), SPRI-Enpresen Garapenerako Euskal Agentzia eta Eusko Jaurlaritzako Industria, Trantsizino energetiko eta Jasangarritasun sailaren ekimena da. Programak zazpi erakunde laguntzaile daukaz, eta horreek kudeatuko dabez bekak, eskaintza-aniztasun handiagoa eta irismen handiagoa bermatzeko. Kontsultatu hemen beken eskaintza bateratua.

Get ready, Be more, Be global!

Adikzinoen Prebentzinorako Udal Zerbitzua ezagutzen dozu? Erdu eta ezagutu eizu!

 

Substantziadun edo substantziarik gabeko adikzinoen inguruan, herritarrei zuzendutako informazino, orientazino eta aholkularitza zerbitzua.

ZER ESKAINTZEN DUGU?

• Tailerrak ikastetxeetan: sare sozialen eta bideo-jokoen erabilera egokia sustatzeko eta droga-kontsumoak eta ausazko eta kirol-jokoen kontsumoa prebenitzeko tailerrak.
• Familia eskolak: familiei bideratutako formakuntza-espazioak.
• Kanpainak herriko eragileekin koordinatuz.
• LOKALEKU programa: gazte lokaletan elkarbizitza egokia sustatzeko.
• Drogen kontsumoa edota hauek edukitzeagatik jasotako isunen ordezko neurri alternatiboen programa nerabeei zuzenduta.

NORI ZUZENDUTA DAGO?

Herriko edozein pertsonari: familiei, haur, nerabe, gazte eta helduei, eragileei…

NON ARITZEN GARA?

• Herriko ikastetxe eta formakuntza-zentroetan.
• Gazte lokaletan.
• Komunitatean.

👥 𝗕𝗘𝗥𝗠𝗘𝗢𝗞𝗢 𝗔𝗗𝗜𝗞𝗭𝗜𝗡𝗢𝗘𝗡 𝗣𝗥𝗘𝗕𝗘𝗡𝗧𝗭𝗜𝗡𝗢 𝗭𝗘𝗥𝗕𝗜𝗧𝗭𝗨𝗔

📲 675025018

📧 bermeoprebentzioa@etorkintza.org

📍 Gizarte eta Kultura Etxea, 1. solairua

📅 Martitzenetik eguenera | 09:00-14:00

Europara bidaiatuko badozu atara eizu Europako Osasun Txartela, Batasuneko edozein herrialdetan osasun zerbitzua izateko

Europako Osasun Txartela (EOT) agiri personal eta besterenezina da, eta eskubidea emoten dau ikuspuntu medikotik beharrezkoak diran osasun zerbitzuak jasotzeko, Europako Eremu Ekonomikoan, Erresuma Batuan edo Suitzan egindako aldi baterako egonaldietan. Aintzat hartuko da prestazinoen izaera eta aurreikusitako egonaldiaren iraupena, helmuga herrialdeko legeriaren arabera, eta egonaldiaren arrazoia turismoa, jarduera profesionala edo ikasketak izanda be.

EOT-ek ez dau balio joan-etorriaren helburua tratamendu medikoa jasotzea danean. Kasu horretan, Gizarte Segurantzako Institutu Nazionalak (INSS) edo Itsasoko Gizarte Institutuak (ISM) jagokon formularioa igorri behar dau, Osasun Zerbitzuaren aldeko txostena jaso ostean.

Kasu batzuetan osasun-laguntzaren zenbateko edo ehuneko finko bat ordaindu beharko da, helmuga Estatuko asegurudunek dabezan baldintza bardinekaz. Zenbateko hori ezin izango da itzuli.

Europako Osasun Txartela banakakoa da eta titularrari osasun zerbitzuak jasotzeko eskubidea bermatzen deutso. Eskatzen daben pertsonei emongo jake txartela eta turismoko bidaietan, ikasketa edota pentsioarengaitik egiten diran leku aldaketetan erabili ahal izango da. Txartelean titularraren izena, NAN zenbakia eta atzetik daukan Segurtasun Sozialeko Institutuaren zenbakia agertuko dira. Horreri esker tramiteak asko arinduko dira, izan be, orain arte derrigorrezkoa zan gaixoa bere herrialdeko Segurtasun Sozialeko bulegoagaz hartu-emonetan jartzea.

Europako Osasun Txartelari esker, Europar Batasuneko hiritar guztiek jaso ahal dabe Batasuneko edozein herrialdetan osasun zerbitzua. Doako zerbitzua izango da hori, eta ordaindu behar baldin bada, ondoren egingo da hori. Txartelaren balioa urte bikoa da (txartelean bertan adierazoten da iraungitze-data).

Egonaldiaren herrialdean zure EOT onartzen ez bada, SOLVIT sarera jo daikezu (solvit@ue.maec.es), Gizarte Segurantzaren Erkidegoko Araudia aplikatzen daben administrazinoen arteko arazoak konpontzeko doako zerbitzua, hain zuzen.

Zelan eskuratu?

• On line, Gizarte Segurantzaren Bulego Birtualean eskatzen badozu, etxean jasoko dozu txartela.
• Telefono bidez: 901 166 565 / 91 542 11 76 telefono zenbakietara deitu eta etxean jasoko dozu txartela, egun gitxiren epean.
• Gizarte Segurantzaren bulegoetan: Bilbon: Avda. Sabino Arana, 3 - 944 284 545 - Vicente Garamendi, 6 - 944 333 003 - Iruña, 13 - 944 478 366 - Gran Vía, 89 - 944 284 517 eta Gernikan: Juan Calzada, 89 - 946 257 107

EOT onartzen daben herrialdeak: Alemania, Austria, Belgika, Bulgaria, Zipre, Kroazia, Danimarka, Eslovakia, Eslovenia, Estonia, Finlandia, Frantzia, Grezia, Hungaria, Irlanda, Islandia, Italia, Letonia, Liechtenstein, Lituania, Luxenburgo, Malta, Norvegia, Herbehereak, Polonia, Portugal, Erresuma Batua, Txekiar Errepublika, Errumania, Suedia eta Suitza.

Gazte Txartelak aterpekide-txartel modura balio dau eta doako bidaiako laguntza-asegurua dauka

2019ko abendutik aurrera, Gazte-txartela doakoa da eta Eusko Jaurlaritzak zuzenean bialtzen deutse 14 urte betetzen dabezan gazteei, eskatu behar barik. Ordutik, Gazte Txartelak, Eusko Jaurlaritzaren gazteentzako agiriak, doako bidaiako laguntza-asegurua dauka, mundu osoan baliogarria dana.

Deskontuez ganera, Gazte Txartelak aterpekide-txartel modura balio dau munduan zehar banatuta dagozan 4.000 instalazinoetan. Holan, gazteek nazinoarteko sareko edozein aterpetan hartu ahalko dabe ostatu.

Gaur egun 80.000tik gora gaztek daukie Gazte-txartela. Europan homologatuta dagoan gazteentzako euskal agiri bakarra da Gazte Txartela, eta Europako Gazte Agirien (EYCA/European Youth Card Association) Alkartearen barruan dago.

Txartel barria inklusiboa —aniztasuna eta baztertutako taldeak kontuan hartzen dauz— eta jasangarria be da.

Gazte-txartela eskuratzeko nahikoa da 14-29 urte izatea (30 urte betetzean bajan emongo jako urteak betetzen dauzan hilabetea amaitu eta batera) eta Euskadin erroldatuta egotea, nahiz eta beste autonomia-erkidego batetik edo atzerritik etorria izan.

Eusko Jaurlaritzako Gazteria Zuzendaritzak kontsulta zerbitzua dauka 682 306 102 eta 945 01 95 11 telefonoetan eta gaztetxartela@gmail.com eta gaztetxartela@euskadi.eus helbide elektronikoetan.

Gazte-txartelak deskontu iraunkorrak (garraioak, ostatua, prestakuntza, kultura, kirolak, osasuna, turismoa, e.a.), lehiaketak eta zozketak, bidaia-asegurua, ikuskizunetarako sarrerak, teknologia eta askoz gehiago eskaintzen dau. Gazte-txartela aurkezteagaitik bakarrik, gazteei deskontuak eskaintzen deutsiezan 1.000tik gora establezimendu dagoz Euskal Autonomia Erkidegoan bakarrik. Ikusi hemen Euskadiko abantailak, udalerriaren edo sektorearen arabera.

Gazte-txartela eta ISIC (Ikaslearen Nazioarteko Txartela): desbardintasunak

• ISIC txartela eukiteko, derrigorrez izan behar da unibertsitateko ikaslea, erdi-mailako ikasketena edo eskola ofizialetakoa; hori frogatuko dauan egiaztagiria behar da. Gazte-txartela eukiteko, barriz, ez da beharrezkoa ikaslea izatea, nahikoa da 14 eta 29 urte bitarteko adina izatea.
• Gazte-txartelaren epea 30 urte artekoa da, ISICena urte betekoa.
• Gazte-txartela Europarako txartela da. ISICek, barriz, mundu osoko herrialdeetan balio dau.
• Europan, orokorrean, Gazte-txartela zabalduago dago.

Diru sarrerak bermatzeko errenta (DBE)

Zer da?

Hileroko prestazio ekonomiko bat da, oinarrizko beharrizanei lotuta dagozan gastuak ordaintzeko nahikoa baliabide ez dabenentzat eta lan-irteera bat topatzen laguntzeko

Nori zuzenduta?

• 18 urtetik gorakoa izatea (adingabe emantzipatuen kasuko zenbait kolektibotan izan ezik).
• 18 eta 29 urte bitarteko pertsonek eskabidea egin aurretik gitxienez urtebete lehenago emantzipatuta egon behar dira, zenbait kolektiborentzat ezarritako salbuespenak alde batera itxi barik.
• 18 eta 23 urte bitarteko pertsonek, eskabidea egiten daben urtearen aurreko urte osoan, inskribatuta egon behar izan dabe lan-eskatzaile lez Lanbide-Euskal Enplegu Zerbitzuan. Horrez ganera, enpleguari buruzko legeriaren araberako betekizunak bete behar dabez. Eskaera  egunean altan egon behar dabe Gizarte Segurantzaren sistema osatzen dauen edozein erregimenetan, edo, holakorik ezean, gitxienez 240 egunez, aurreko urte bietan, hainbat kolektiborentzat ezarritako salbuespenak alde batera itxi barik.

Baldintza gehiago:

• Bizikidetza-unitate (BU) batean integratuta egon behar dau.
• Euskal Autonomia Erkidegoko udalerriren batean erroldatuta egotea eta bertan benetan bizi izana eskaera egin aurretiko hiru urteetan
• DBE eskatu aurretik, eskubidez jaso litzaketen pentsio eta prestazio publiko guztiak eskatu izana
• Borondatezko lanaldi murriztua, eszedentzia edo bestelakorik ez izatea

Informazio gehiago

Eskabidea eta derrigorrezko dokumentazioa

Mugikortasun gida 2025: ausartu zaitez Europar Batasunean ikastera eta lan egitera!

Europak ateak irekitzen dizkizu ikasketekin jarrai dezazun edo zure karrera profesionala has dezazun kultura berriak ikasten dituzun bitartean.

Europar Batasuneko kide gisa, Bizkaiko herritarrok abantaila eta onura ugari ditugu bertako herrialde guztietan, hala nola EBko edozein herrialdetan ikastea, unibertsitateko edo lanbide-heziketako titulu ofizialak baliozkotzea, eta atzerrian lan-baimenik gabe lan egitea eta bizitzea.

EBko herrialderen batean zure bizitzaren etapa berri bati ekiteko erronka onartu nahi baduzu eta zure ikasketekin jarraitzea, au pair gisa lan egitea, edo beste herrialde batean lana lortzea bertako hizkuntza ikasten, lagun berriak egiten eta tokiko kultura ezagutzen duzun bitartean, zure desafio berrian lehen urratsak egiten laguntzeko Bizkaiko Foru Aldundiak argitaratutako Mugikortasun Gida Europar Batasunean 2025 kontsulta dezakezu.

Gidan, honako hauek kontsulta dezakezu:

• EBri buruzko oinarrizko gaiak
• Herrialdeen arteko mugikortasuna eta Batasuneko herritarra izateagatik eta lan egiteko eta ikasteko dituzun eskubideak
• EBko herrialdeetan lan egiteko eskubidea
• EBren ekintzak hezkuntzaren eta prestakuntzaren arloan
• Programak eta ikasteko aukerak
• Lan egiteko eta ikasteko mugikortasunaren egoera.
• Batasuneko estatu bakoitzean sartzeko eta bertan bizitzeko bete behar dituzun izapide zehatzak eta helmugako herrialdeei buruzko beste informazio interesgarri batzuk ikusiko dituzu.

Kapitulu honetan, Erresuma Batuak EBtik atera ondoren duen egoerari buruzko atal berezi bat ere badago, baita Brexitaren ondoren bizitzeko, lan egiteko eta/edo aztertzeko baldintzei buruzkoa ere.

Euskal abizenak euskal grafiaz idazteko kanpaina martxan jarri dau Bermeoko Udalak

Euskal abizenak euskal grafiaz idazteko kanpaina martxan jarri dau Bermeoko Udalak, UEMAren laguntzagaz, munduan euskaldunek presentzia izateko.

Bermeon oso zabalduta dagozan abizen asko idatzi daitekez euskeraz: Atxikallende, Allika, Argiarro,  Etxebarria, Bulukua, Markaida, Erauzkin, Gabantxo… kanpaina hori, bere euskal abizena gaztelaniazko grafiaz idatzita dauenari zuzenduta dago, emon behar dauzan pausuak argitu eta epaitegian aldaketa eskatzeko.

Horretarako, UEMA-k prestaturiko informazino-orriak banatu dira herriko udal zerbitzuetan, ikastetxeetan, euskaltegietan eta Hizkuntza Eskolan.

Informazino-orrietan jasotzen dira aldaketa egiteko emon beharreko hiru pausuak:

✓ Erregistro zibilean edo bake epaitegian aldaketa eskatu.

✓ Eskaera orria bete.

✓ Agiri honeek eroan:

• Nortasun Agiriaren fotokopia (adinez nagusia ez danak gurasoena eroan behar dau).
• Hitzez hitzeko jaiotza ziurtagiria (epaitegian eskatzen da).
• Errolda agiria (Udaletxean eskatzen da eta, adinez nagusia ez bada, gurasoena beharko dau).
• Familia-liburuaren fotokopia (familia edo seme-alabak badaukaz).
• Seme-alaben nortasun agiriaren fotokopiak, 16 urtetik gorakoak badira.

Horretaz ganera, izena edo/eta abizena euskeraz zelan idatzi behar dan kontsultatzeko www.euskaltzaindia.eus webgunean bilatu ahal da informazino osotua.

Bestalde, epaitegietan egiten diran beste tramite batzuk be euskeraz egin daitekez. Holan ba, epaitegian erregistratzen diran jaiotza, ezkontza eta heriotza-inskripzinoetan, euskera erabiltzeko aukera badago.

Ezagutu eizu Busturialdeko gazteria zerbitzuek martxan jarritako Gaztedi Busturialdearen webgunea, eskualdeko gazteei zuzenduta

Bermeoko eta Gernika-Lumoko udaletako Gazteria zerbitzuek eta Urremendi Landa Garapen Elkarteko Gazteria zerbitzuak www.gaztedibusturialdea.eus web-orrialdea jarri dabe martxan, Bizkaiko Foru Aldundiaren 'Udal Gaztedi' programaren barruan. Horretan, Gaztedi Busturialdea proiektuan lantzen dabezan lan ildoak batzen dira.

Enplegua, bekak, prestakuntza eta ekintzailetza dira lan arlo nagusiak eta horreetan eskaintzen dabenaren informazinoa batzen da webgune barrian. Ganera, ikastaro, berbaldi edo bestelakotan izena emoteko aukera be dago bertan.

Atariak, ganera, ikastaro, hitzaldi edo bestelakotan izena emoteko izapideak be errezten dauz, aukera emoten baitau izen-emotea bertan egiteko.